2023-2024 Hezkuntza programa eta aurkezpena

“Artistek ez dugu artelanik ekoizten. Praktikak asmatzen ditugu. (...) Praktika horiek espazioa, denbora, gorputz-organoak, mugimenduak eta pertzepzioa erabiltzeko moduak eta esperimentatzeko protokoloak dira. (...) Praktika artistikoa zeharkatze-potentzia bat da”
Silvio Lang (2019). Manifiesto de la práctica escénica.
In B. Hang y A. Muñoz (ed.), El tiempo es lo único que tenemos.

Hezkuntza praktika bat da. Entrenamendu bat. Ariketa bat. Esperimentu bat. Jokoan jartzen gaituen egoera bat; gure lekutik mugiaratzen gaituena, bestearekin hartu emanean jartzera bultzatuz. Eta hori da bere potentzia: gu, denok, zeharkatzea.

Elkar zeharkatzearen, afektatzearen helburu eta desio honekin aurkezten dugu 2023-2024 ikasturterako hezkuntza-programa.

Desio honekin batera, hezkuntza-praktiken konplexutasuna ere azaleratu nahiko genuke. Espazio ezegonkor eta aldakorrak dira ikaste-egoerak edo uneak, non gure ustetan ez dagoen ez arrakasta ez porrot borobilik. Kontutan hartu beharreko elementu guztien gurutzaketan oreka ezegonkor bat sostengatzea litzateke helburua. Izan ere, beharrezkoa da hezkuntza prozesuen bidez agertzen diren ezinegonak ikusaraztea. Ezinegon uneak izan daitezkeelako espektatiben apurketa bat, eta erosoak diren moldeekiko urruntze bat. Ikaskuntza eta eraldaketa potentzia handia dago hor, deseroso egoteak sortzen digun adi egote horretan. CA2M museoko hezkuntza arloko kideek duela urte batzuk No sabíamos lo que hacíamos argitalpenean abiatutako elkarrizketa iradokitzaileetara batu nahi dugu. Badakigulako norantz joan nahi dugun, baina horretarako ez dagoelako bide-orri finkorik. “Imajinatzea imajinatzen ikastea” delako, ezustekoarekin, esaten eta ikusten ez denarekin mugitzen den praktika bat.

Une horietan, hezitzaileon erreminta-kaxan konfiantza izatea dagokigu, beste ikaskuntza-leku batzuetara eramango gaituzten nahasketa berriak probatzeko. Lantegi batetik bestera, aurten gorputzarekin entzuten saiatu gara. Ahotsarekin idazten. Pentsamenduarekin sokasaltoan aritzen.

Zatozte eta asmatu ditzagun elkarrekin elkar afektatzeko praktikak.

Programan 2023-2024 ikasturterako zehaztu ditugun lan ildo eta elkarrekin egoteko modu ezberdinen berri ematen da. 

Ideia hauetan gehiago sakondu eta programa ezagutzera emateko bilera bat antolatu dugu. Ezinegon eta interes ezberdinak partekatzeko aukera izango dugu, elkarlanerako aukerak irekiz.

Eguna: Irailak 22, ostirala

Saioak:

11:00 (EU)

12:30 (ES)

Bertaratu nahi izanez gero, mesedez bidali email bat hezkuntza@tabakalera.eus helbidera, izen-abizenak, telefono zenbakia, emaila eta nondik zatozten adieraziz.