Ezinezko zinema baten alde, dokumentala eta abangoardia Kuban (1959-1972) - 8. Saioa: Borroka luzeak (109')
79 primaveras filmean, Santiago Álvarezek omenaldi lirikoa egiten dio Ho Chi Minh-i. Izenburuak vietnamdar buruzagia hil zeneko adinaren aipamena egiten du eta zinearen historiako dokumental biografiko ezohikoenetako bat da. Hileta Iron Butterflyren musikarekin lagundurik agertzen da eta filmeko fotograma batzuk sutan lehertzen dira pantailan bertan.
Manuel Octavio Gómezen La primera carga al machete dokumentalaren eta gertaeraren artean kokatzen da. Peter Watkins-en gertukoa, denboran eta metodoan, Gómezek 1868ko Independentzia Gerrako bataila sonatu bat filmatu du, erreportaje dokumental moderno balitz bezala, bi aldeetako borrokalariekin egindako elkarrizketekin osatzen dena. Film honetan, ICAICek Espainiaren aurkako independentzia gerrak ospatzeko buruturiko produkzioetako bat, Gómezek ikuspegi guztiz esperimentalaren alde egiten du, hala alderdi bisualean nola narraziokoan. Lorturiko emaitza zine historiko konbentzionalaren aurkakoa da erabat, zine horren hanpadura jasanezina gertatzen baitzitzaion Gómezi.
Santiago Álvarez eta Manuel Octavio Gómez zuzendarien filmeen proiekzioa, 'Ezinezko zinema baten alde, dokumentala eta abangoardia Kuban (1959-1972)' zikloaren baitan.