Bestelako diagramak, bestelako istorioak: Artistaren afera medium gisa

Emma Kunzen unibertsoa erakusketa gehitu egin zaio 1980ko hamarkadatik modernitateak “espiritualitatearekin” eta ezkutuan dagoenarekin duen harremanari heldu dioten erakusketen zerrendari. Oraindik ere interes handia pizten du hemeretzigarren eta hogeigarren mendeetako arte mediumistikoak, egiazkotasunaren beharrari artearen ikuspegitik heltzen baitio, erabaki kanonikoetatik askatuta –barne hartuta abangoardiako artea eta politika belztu dituen sexismoa. 

Espero ez ditugun eta batzuetan nahasgarriak zaizkigun bideak erabilita, mediumismoak izateko, gizartean jarduteko eta pentsatzeko ditugun antolaketa- moduak bilatzen ditu. Alde batetik, artista eta kolektibo mediumisten lanaren ezaugarri bereizgarria (eta sarritan gutxiegi aitortua) da espiritualtasunaren kontzeptuari esanahi berriak emateko borondate progresiboa duela. Bestalde, ezkutuan dagoenak harreman oportunista du politikoki bidegabeki erabil daitekeen sen onarekin. 1930eko hamarkadan esan zuen jada Walter Benjaminek “ezkutuan dagoenari, surrealista denari eta dohain eta fenomeno fantasmagorikoei” buruz “solaskidetzaren” bidez hitz egin behar zela, erromantizismoa saihesteko –eta faxismoan berriro ez erortzeko, gehi diezaiokegu.