Deialdi honen sorburua honako hau da: jardun artistiko garaikideak hezkuntza-estrategia gisa txertatzeko beharra, irakasleei baliabide berriak eskaintzekoa eta, aldi berean, eskola barruko zein kanpoko lan kolaboratiboa sustatzekoa. Era berean, irakasgai “artistikoen” eskola-curriculumeko edukiak astindu, beste irakasgaiekin loturak sortu eta horiek jorratzeko beste modu batzuk bilatu nahi ditu.
PRAKTIKASTIKAren erronka nagusia da gazteen errealitatera gerturatzea da, euren interesetatik abiatuta, artearen bidezko ikaskuntza- eta sorkuntza-prozesu baten bidez. Gure ustez, ikasleak, hau da gazteak, edukien kontsumitzaileak dira, baina baita sortzaileak ere; batez ere ikus-entzunezko eduki digitalenak. Baliabide horien bitartez zentzu kritiko eta sortzailea jorratu daiteke.
Norentzat da?
Donostialdeako Bigarren Hezkuntzako edozein ikastetxetako Plastikako, Ikusizko eta Ikus-Entzunezko Hezkuntza, Teknologia eta Digitalizazioa edo Adierazpen artistikoa bezalako irakasgaietako ikasle eta irakasleei zuzendua dago, hasiera batean. Hala ere, hezkuntza eremuko beste irakasle edota agenteen arteko aliantzak interesatzen zaizkigunez, deialdi hau irekia dago estrategia artistikoak bere lan-metologian txertatzeko interesa daukan Bigarren Hezkuntzako edozein hezitzaileri.
Noiz egingo da?
Proiektua 2023-2024 ikasturtean burutuko da. 2023ko irailean hasi eta 2024ko ekainean amaituko da. Proiektua egiteko ordutegia eta egutegia parte hartzen duen ikastetxearekin adostuko da (eskola-ordutegiaren barruan).
PRAKTIKASTIKA lankidetza proposamen bat da, Tabakalerako Hezkuntza Sailak eta BH-ko ikastetxe batek eskola‑eremuan artea beste modu batzuetara jorratzeko.