El enemigo principal (Jatun auka), Jorge Sanjinés, Bolivia-Peru, 1973, 103'

Ekainean, Inti Raymiren hilabetean, Eguzkiaren jaia ospatzen da Peruko Andeetan; horrek, ipar hemisferioan ere udako solstizioa esan nahi du. Jatum Auka (El enemigo principal) filma fikzioaren eta Saturnino Huillca Quisperen testigantzaren arteko nahasketa da. Azken horrek herriaren historia kontatzen du, eta historia horrek bizirik dirau beren lurraldearen autonomia eskatzen duten komunitate gutxituen eskaeretan. 70eko hamarkadan, etsai nagusia aberatsak ziren, eta, gaur egun, konpainia estraktibisten itxura hartu dute.

Jatum Auka (El enemigo principal) filmeko protagonistak eta narratzaileak Raqchi (Cusco) herriko bizilagunak dira. Bertan, nekazari batek pairatu zuen lapurreta bat argitzeko eskatzen du, eta, horregatik, lur-jabe batek hil egiten du. Gainerako herritarrek horren berri dutenean, justizia eskatzen diete agintariei, baina agintariek nahierara aberatsen alde egiten dute. Gerrillarien talde berri bat iristen da komunitatera, herriko epaiketa bat antolatzen dute, eta komunitateak erabaki berriak hartu eta horien ondorioak bizi beharko ditu.

Saio honetan, A(r)mar la cámara zikloak UKAMAU taldearen (“horrelakoak gara” esan nahi duena) lanean jarri du arreta; Sanjinés da horren sortzailea eta kidea. Talde horrek 50 urtetik gora daramatza Panandinako eskualdeko herri baztertuen askapenaren aldeko zinema politikoa sortzen. Saio honen ostean, solasaldia egongo da Isabel Seguí ikertzailerekin. Seguík Ukamau Taldearen lana arreta handiz aztertzen du (kolektibo gisa finkatu zenetik), baita emakumeek kameraren aurrean eta atzean duten partaidetza eta beren artisau-ekoizpenerako moduak ere.

Isabel Seguí ikertzailearekin elkarrizketa. 

Isabel Seguí Film Ikasketetan doktorea da St Andrews-eko Unibertsitatean (Eskozia). Gaur egun Leverhulme doktoratu osteko bekaduna da Edinburgoko Unibertsitatean, eta abuztutik aurrera irakasle titular gisa hasiko da lanean Eskoziako Aberdeen Unibertsitateko Zinema eta Kultura Bisualeko Departamentuan. Bere lana Europako eta Ameriketako aldizkarietan argitaratu da, hala nola Feminist Media Histories, Latin American Perspectives, Secuencias y Cine Documental eta argitaratutako bilduma askotan. María Aimarettirekin batera argitaratu zuen Secuencias. ‘Ukamau Abigarrado: Nuevas miradas críticas y fuentes de investigación’ (2020). Gaur egun, "Documentos para una historia feminista del cine latinoamericano" izeneko ale berezia editatzen ari da, 2023an Studies in Spanish and Latin American Cinemas aldizkarian agertuko dena. RAMAko (Red de Investigación del Audiovisual hecho por Mujeres en América Latina) batzorde antolatzaileko kide ere bada, eta No Master Territories. Feminist Worldmaking and the Moving Image erakusketako komisario taldeko kidea ere bai. Erika Balsomek eta Hila Peegek komisariatu dute eta Berlingo (Alemania) HKW museoan abuztuaren amaierara arte ikusgai egongo da.