Egon al gaitezke bi lekutan aldi berean? Europako zinema-jaialdi ospetsuenetako batean eta gure zinema-aretoan, adibidez? Bada, horixe proposatzen dugu IFFR Live Event saioarekin. Rotterdamgo Zinema Jaialdia urtarrilaren 25etik otsailaren 5era bitartean izango da, eta Tabakaleran bat egingo dugu harekin, zuzenean. Aurtengo sail ofizialeko filmetako bi esklusiban emango ditugu, eta, horrez gain, filmaren aurkezpenera birtualki bertaratzeko eta protagonistekin hitz egiteko aukera eskainiko dugu (ingelesez, itzulpenik gabe).
Iaz, 45 zinema-areto baino gehiago konektatu ziren zinema-jaialdiarekin, zuzenean, Europako 17 herrialdetan. Aurten, guk ere bat egingo dugu tigrearen festarekin –tigrea baita, hain zuzen, Rotterdamgo Zinema Jaialdiaren sinboloa–, eta espazio-denboran gurekin bidaiatzeko proposamena egingo dizuegu.
Rotterdamgo Nazioarteko Zinema jaialdiarekin zuzenean konektatuko duen saioa hartuko du Tabakalerak eta jaialdiaren programazioko bi film estreinatuko ditu esklusiban, filmaren aurkezpena eta bere protagonistekin solasaldia eginik era birtualean.