Larritasunak jota dago Julia. Ezin du ulertu zergatik itotzen duen hainbeste komun publiko horrek. Gertakari arraro eta ilunek geldiarazi egiten dute, egia onartezinera daramaten izu, heriotza eta damuaren espiralean murgilduz.
Hau da Lucas Milla zinegile gazteak, Egoitz Eguizabalekin elkarlanean, burutu duen lehen laburmetraia. Zinemarekiko zaletasunak, erreferentziak, desioak eta asmoak bildu ditu bertan.
Bere lan hau aztertu eta komentatzeko elkartuko gara Medialaben, prozesuaz mintzatzeko, erabakiak komentatzeko, zailtasunak mahai-gaineratzeko. Horretarako, Lur Olaizola Lizarralde, zinegilea eta Tabakalerako Zinema eta Ikus-entzunezkoen koordinatzailea izango dugu gonbidatu, bere esperientzia ere gure artean partekatzeko.
Lehen ikusentzunezko lan bat nola bideratu, ze alderdi izan kontutan, zein zailtasun aurkituko ditugun, eta bereziki, lehen esperientzia batetik nola hobetu eta zer ikasi dezakegun izango dira saio honetako ardatzak. Goazen lehen lan hau aztertzera!
Lucas Millaren "A Way Out" lehen lanaren proiekzioa eta azterketa.