Bi izaera eta lan egiteko modu ezberdin, gai eta interes amankomunen inguruan aritzeko elkartuta prozesu ireki baten aurrean. Jakinnahi batetik sortutako proiektua da, eraikin baten (Tabakaleraren) funtzionamendua, barne- eta kanpo-bizitza, bertako komunitatea, erabiltzaileak, programa, konexioak… ulertu nahi izatetik. Zer dago kaxaren barruan? Zer entzuten da bertako espazioetan? Eta kanpoaldean? Nola hautematen da zentroa barrutik, eta nola kanpotik? Zein hizkuntza hitz egiten dira zentroan, zein dira hitzik gabeko kodeak, hizkuntz politika, genero-ikuspegia, espazioen arteko harremanak, hiriarekin duen lotura, kontsumo-motak, leku fisikoaren eta mundu digitalaren arteko lotura, sare sozialen eragina… eta oraindik bururatu ez zaizkigun hainbat gai aztertu nahi ditugu. Bien arteko elkarrizketatik eta eztabaidatik sortuko da, beraz, proiektua.