A4 tamainako azetato orriak, tinta permanente beltzarekin
Zintarekin egindako diagrama
Tabakalera ardatz hartuta, eraikinaren funtzionamendua ulertu eta azaleko normaltasuna zalantzan jartzetik sortutako proiektua da. Eraikinaren barne- eta kanpo-bizitza aztertzen da, bertako komunitatea, erabiltzaileak, programa, konexio espazialak, bertan sortzen diren harremanak, hitz egiten diren hizkuntzak, eztabaidatzen diren gaiak…
Arreta ohiko datu eta neurketetan jarri beharrean, neurtzen eta ikusten zailagoak diren beste elementu batzuetan oinarritu ziren artistak: arnasak utzitako arrastoak, oinatzen askotariko mugimenduak, espazioan entzuten diren hotsen erritmoak edota itzalen dantzak.
Nola atzemango litzateke kultur zentro bat beste logika batzuei erreparatuko bagenie? Zer alternatiba lirateke posible zentzumenak beste era batean erabiliko bagenitu? Zer azaleratuko litzateke?
Angelu berrietatik egindako hausnarketa horietatik sortu ziren eskala txikiko lehen maketak eta diagramak, eta horiek planoetara zein espaziora eramateko saiakerak egin ziren ondoren. Hemen ikusgai daude diagrama horiek, eta baita horiek eskala handira eramateko saiakera bat ere.