Agnès Vardaren Salut les cubains film subjektibo bat da, zinegileak 1962-1963ko egonaldian atera zituen milaka argazkiren artean aukeratutakoek osatua, kubatar musika eta iruzkin laburrak konbinatzen dituena. Zinegileak berak «sozialismo eta txa-txa-txa» gisa definitu zuen filma. Ella, Theodor Christensen daniar zinegile beteranoak egina, Iraultzaren garaiko emakumearen egoerari buruz ICAICek ekoitzitako lehenengo filma da.
Sara Gómez, intelektual beltzen ordezkari gailenetako batek kubatar zinean aztarna utzi zuen lehenengo emakume zinegilea da. Iré a Santiago, aldiz, free cinema estiloko bidaia da, «mulato izatea gogo aldartea den» leku bati buruzkoa. Y tenemos sabor filmak Kubako musikan erabilitako perkusio instrumentuen sorta exotikoaz eta horien jatorriaz dihardu: klabeak, koilarak, marakak, bongoak, guiroak (kuiz egindakoak), zintzarriak, zaldi masailezurrak. Gómez musikaria zen prestakuntzaz eta haren muntaketa sinkopatuak musikaren erritmo gurutzatua jasotzen du, kontrapuntu gisa erabiltzen duela.
Agnès Varda, Theodor Christensen eta Sara Gómez zuzendarien filmeen proiekzioa, 'Ezinezko zinema baten alde, dokumentala eta abangoardia Kuban (1959-1972)' zikloaren baitan.