East of Paradise, Lech Kowalski, Frantzia-AEB, 2005, 108’, JBAES, DCP
Kowalski Play-doc-en zuzendari kuttunetako bat da, eta obra hau jaialdiko film maitatuenetako bat da. Harribitxi bat.
«Zergatik filmatu nahi nauzu orain?». galdetu zuen amak. Semeak, Lech Kowalskik, ez zuen jakin zer erantzun. Oraindik ez zekien. Film hau egin behar izan zuen erantzun ahal izateko; aurrena bere buruari, eta gero bere amari. Hauxe de bere istorioa. Maria Werla Polonian atxilotu zuten Bigarren Mundu Gerraren hasieran, eta lan-esparru sobietar batera bidali zuten, Siberiara. Bizirik irten zen handik. Lech Kowalski Estatu Batuetan hazi zen, bere jaioterritik urrun, baina presente izan zuen uneoro borroka-istorio hori. «Protesta nire kultura bihurtu zen», dio Kowalskik. Eta halaxe izan zen. Bere zineman, gizartearen alboko ertzetan bizi zirenen erretratua egin zuen: punk mugimendua, Sex Pistols, Dee Dee Ramone, Johnny Thundersen birak...
Underground zinema, inkorfomista. Bizirik irauteko borroka eta bizitzagatiko pasioa bere lanen estiloaren adierazle bilakatu ziren. Film honekin itxi zuen Kowalskik bere Wild Wild West trilogia ezaguna. Alderdi basatia. Film honetan, ama-semeek beren bizitzaren istorioa kontatuko diote elkarri. Erretratu bikoitza da beraz, Veneziako zinema-jaialdiko 62. edizioan Orizzonti saileko film onenaren saria jaso zuen hau.
Lech Kowalski Play-doc jaialdian zuzendari kuttunetako bat da, eta 'East of Paradise' jaialdiko film maitatuenetako bat da. Harribitxi bat.