18:00
Braguino, Clément Cogitore, Frantzia, 2017, 49’
Ezerezaren erdian, urruti, zibilizaziotik oso urruti, ezer ez dagoela dirudien leku horretan, bizitza bada. Pelikula dokumental hau FID Marseille jaialdiko nazioarteko lehiaketan errebelazio handienetakoa izan zen eta epaimahaiaren aipamen berezia jaso zuen.
Siberiako Taigako leku urrun batean bizi diren bi familiaren erretratua eta topaketa, ikuslearentzat bakanak diren esperientzia horietako bat. Zinema bere burua berrasmatzen ariko balitz bezala, eta pelikula honek galduta edo ahaztuta geneuzkan irudi, keinu eta begiradak lehen aldiz erakutsiko balizkigu bezala. Primitiboa dena, arbasoena, jatorrizkoa eta egiazkoa Cogitorek filmatu duenaren antzekoa izan behar du, gertuen dagoen herritik 700 km-ra. Leku horretan ez dago errepiderik eta iristeko modu bakarra Lenissei ibaia nabigatzea da eta ondoren, helikopteroa hartzea. Braguine eta Kiline familiak burujabeak dira eta euren arau eta printzipioen arabera bizi dira. Baina leku honetan ere badira gatazkak: bi senidek ez diote elkarri hitzik egiten. Beldurra, askatasuna, haurtzaroa, arauak, arauen imitazioa, gaua, basapiztiak, basoaren handitasunak sortzen duen poza… Urteko filmetako bat da emaitza, orain dela milaka urte, ezagutzen dugun guztiaren iturburua izan zen gatazkaren istorio zahar eta krudela.
21:00
Ni le ciel, ni la terre, Clément Cogitore, Frantzia, 2015, 100’
Clément Cogitore (Colmar, 1983) zinemagile eta artista frantsesak lehen film luzea Canneseko Kritika Astean aurkeztu zuen, 2015 urtean. Henri Langlois Saria eta Lehen luzemetrai onenaren Kritika Saria jaso zituen, egungo zinemagile handienen pareko bilakatuz.
Afganistanen, 2014 urtea. Tropak erretiratzear daude, baina Antarès Bonassieu kapitaina eta bere eskuadroiak betebehar bat dute: Pakistaneko mugaldeko Wakhan aranean zelatan gelditu behar dira. Antarès eta bere gizonen jarrera ausarta den arren, gutxinaka egoeraren kontrola galduko dute. Gau ilun batean, soldaduak desagertzen hasiko dira, azalpenik gabe.
Clément Cogitore (Colmar, 1983) zinemagile eta artista frantsesak lehen film luzea Canneseko Kritika Astean aurkeztu zuen, 2015 urtean. Henri Langlois Saria eta Lehen luzemetrai onenaren Kritika Saria jaso zituen, egungo zinemagile handienen pareko bilakatuz.