Nire azken proiektuetan, mundu digitala eta fisikoa bereizten dituen ildoaren ideia lantzen dihardut, eta aurrerapen teknologikoen ondorioz ildo hori nola ari den gero eta gehiago lausotzen. Materiala denaren eta ez-materiala denaren arteko lotura interesatzen zait, errealtzat jotzen dugunaren eta errealtzat jotzen ez dugunaren arteko lotura. Horretarako, irudiak edo bideoak 3Dn sortzean, mundu fisikoko elementuak erabili ohi ditut (esaterako, 360º-ko maila dinamiko handiko irudiak), modelatzen ditudan piezak argiztatu eta espazio jakin batean kokatzeko; eta hainbat elementu natural edo artifizialen eskaneatzeak edo argazkiak, testurak sortzean. Lan-prozesuak nire obraren zati oso garrantzitsua izan dira beti; baina ia esklusiboki formatu digitalean lan egiten dudanez, eta aurrerapen teknologikoek prozesu horiek gero eta gehiago automatizatzen dituztenez, gaur egun beste lan-metodo batzuekin esperimentatzea interesatzen zait, nire pieza birtualak mundu fisikora eramanez. Horretarako, 3Dko inprimaketak sortuko ditut, modelatze- eta huste-prozedurak egingo ditut, hainbat material natural eta artifizial sartuko ditut eta modu tradizionalean eraikiko ditut, azken batean, nire lan digitalekin osa daitezkeen objektu ukigarriak sortzeko. Pieza berri horietako batzuk mundu birtualera eraman litezke berriz ere 3D eskaneatzeen bidez; izan ere, benetan interesatzen zaidana da lehen begiratuan antzekoak diruditen emaitzak lortzea, nahiz eta prozesu guztiz desberdinetatik abiatzen diren. Azken helburua obra ukigarriak eta digitalak txandakatzea izango da, eta honako hauek egin ahal izateko espazioak sortzea: aldi berean, alderdi fisikoa eta birtuala esperimentatzeko, piezekin elkarreragin osoagoak ahalbidetzeko; ikuslearen pertzepzioari desafio egiteko haien izaera interpretatzeko orduan; eta teknologiak errealitatea ulertzeko eta inguratzen gaituen munduarekin lotzeko duen zereginari buruzko hausnarketa bultzatzeko.
