Putas Amak + LaMia Mari

Tabakalerako Ate irekiei amaiera emateko, bosgarren solaliruko Prisma aretoan musika-ospakizun bat izango da.

Putas Amak Lorea, Oiane eta Nahikari dira, eta Egiatik musika elektroniko esperimental eta pertsonala egiten dute, generoaren barruan estilo eta sonoritate ezberdinak jorratuz. Bere abestiek soinu apartak esploratzen dituzte punketik technora bitarteko elementuekin eta Alai ekoizlearekin elkarlanean sortutako dantza erritmoak uztartuz, dantza pista pizteko aproposak dira. Bere hitzek, amatasunari, krisiei, harreman afektiboei edo egunerokotasunari buruz ikuspegi feministatik hausnartzen duten bitartean, hizkera hurbila eta dibertigarria dute ezaugarri, baita publikoarekiko lotura handia ere, beren podcastean erakutsi zutenez.

Jaiari amaiera emateko, LaMia Mari Donostian bizi den DJa izango dugu gurean. Berak, Latinoamerikako, Afrikako eta Karibeko erritmo leherkorrenak soinu elektroniko esperimentalekin uztartzen ditu. Bere set-ak klubeko musikaren ertzetan zehar egindako bidaia bat dira, mugak eta generoak gainditzen dituen esperientzia musikal bat sortuz.