Storytelling, Todd Solondz, AEB, 2001, 87', JBAES, DCP.
Ez-zuzenaren maisua. Ironikoa. Garratza. Perbertsoa, satirikoa, errukirik gabea. Bere karreran zehar, zinemagile gisa, iparramerikako gizartearen balioak suntsitu dituena. Bere sekretu esanezinak erakutsi dituena. Happiness (1998) filmatu zuen gazte eta ez horren gaztea, goia jo zuena baina hala ere zuzendari independente probokatzaileenen artean kokatzen dena. Todd Solondzi buruz ari gara, bai. oraingoan sormenezko idazketa munduan zentratzen den erretratu bikoitza aurkeztuz. Lehenengo zatiak “Fikzioa” izena du eta institutu bateko idazketa klaseak ditu ardatza. Bigarrenak “Ez-fikzioa” izena du eta New Jerseyko familia disfuntzional bat eta bere seme nerabea erretratatzen ditu. Musika Belle & Sebastian-ek egin zuen. Pelikula Cannes jaialdian aurkeztu zen Un Certain Regard sailean.
"Todd Solondz-en Storytelling fikzio eta ez-fikzio generoei buruzko pelikula da, narratiba eta dokumentala. Lehenengo zatiak, fikzioa izenekoak, iparrameriketako sistema akademikoaren barruan ohikoak diren sormenezko idazketa mintegietan kokatzen gaitu, etorkizuneko idazleek dagoeneko irakasle-idazleei ospetsuei aurre egin behar dieten lekuan. Edozein transmisiok dakarren jakite-botere erlazioak eta idazlegaien subjektibitate mekanismoak, zinemagilea bereizten duen garraztasun ironikoak suntsitzen ditu. Bigarren zatia, ez fikzioa, bigarren hezkuntzan murgilduko da, institutua eta gazteengan sortutako etorkizun gabezia sentimenduan. Egokia iruditzen zait pelikula hau ikustea bizi dugun kultur garaian, akademiaren hedapena, amaierarik gabeko unibertsitate bizitza, gure gizarte post-fordistaren ezaugarri bilakatu den honetan. Aldi berean, Storytelling-ek onkeriaren arazoei begiratzen die (azkenaldian bolo bolo dabilen gaia). Eta ikasketa kulturalen instituzionalizazioari. Aldi berean genero bat ere bada, izenburuak erreferentzia egiten dion kontatzeko arteak, Storytelling-ak, aktibatze praktiko eta operatibo baterako aukerak irekitzen dituen. Idazketa eta bere prozesuei buruz pentsatzeko ez zait pelikula hoberik bururatzen eta horregatik erabaki dut arte kritika eta idazketari buruzko mintegi batean programatzea".
Peio Aguirre
Peio Aguirre komisario eta arte kritikariak aurkeztuko digu Todd Solonz zuzendariaren filma.