Uraren erabilerak eta gehiegikerien soinu paisaiak izeneko egitasmoak uraren erabilerak ingurumenarengan eta gizakiengan duen eragina aztertu nahi du. Bereziki praktika jasangarri eta jasanezinen arteko kontrasteak eta kezka lokal, nazional eta globalen arteko interdependentziak agerian geratzen diren lekuetan jartzen du arreta. Diziplina anitzen arteko -soinua, kazetaritza, ikusizko arteak, geografia, zientzia- eta maila ezberdinetan parte hartzen duten pertsonen arteko elkarlana izateko bokazioz jaiotako egitasmoa da.
Proiektu honen harira, Peter Cusackek HidroLogikak. Ibaitik badiara egitasmoaren seigarren edizioan parte hartuko du datozen egunetan, tailer bat eskainiz Cristina Eneako Ingurumen Baliabideen Etxean eta hitzaldi bat Tabakaleran.
Tailerrean uraren erabilerak ingurumenarengan eta gizakiengan duen eragina aztertu nahi da. Bereziki praktika jasangarrien eta jasanezinen arteko kontrasteetan, eta, kezka lokal, nazional eta globalen arteko interdependentziak agerian geratzen diren lekuetan jartzen du artistak arreta. Tailerak Urumea ibairantz gerturatuko du belarria, elkarlanean, mikro-ikerketez osatutako ibaiari buruzko ikuspegia osatzeko helburuarekin.
Jarduera Audiolabek koordinatuko du, aldez aurretik izena eman beharra dago (943453526 / cristinaenea@donostia.eus) eta Cristina Enean izango da (ingelesez) apirilak 4 eta 7 artean, biak barne (10:00etatik 13:00etara eta 16:00etatik 19:00etara).
Bestalde, apirilaren 8an, ostirala, arratsaldeko 19:00etan Peter Cusackek hitzaldia eskainiko du Tabakalerako Z aretoan, ‘Uraren erabilerak eta gehiegikeriak: Tigris eta Eufrates’ izenburuarekin (ingelesez).
Azken urteotako ikerketa lanek potentzialki arriskutsuak diren lekuekin harremanetan jarri dute Peter Cusack ikerlari britainiarra. Bereziki kalte ekologiko larriak jasan dituzten lekuak aukeratu ditu horretarako: gune nuklearrak, olio putzuak, zonalde militarizatuak… Leku “arriskutsu” hauek begiradarentzako nahiz entzumenarentzako erakargarriak izan daitezke, baita, zergatik ez, ederrak eta atmosferikoak ere. Hitzaldiak, ikerketa kasu zehatz bat izango du hizpide: Turkiako hego-ekialdean, Tigris eta Eufrates ibaien arteko haranetan eraiki nahi dituzten urtegi erraldoien egitasmoa hain zuzen ere.
Cristina Enea Fundazioarekin elkarlanean antolatutako ekimena da.
Peter Cusacken hitzaldiak ikerketa kasu zehatz bat izango du hizpide: Turkiako hego-ekialdean, Tigris eta Eufrates ibaien arteko haranetan eraiki nahi dituzten urtegi erraldoien egitasmoa hain zuzen ere.