Atlas. Turbo-tardo-zine. Edizioa eta maketazioa

Urtarrilan abiatu genuen urte honetako formatu berria: 10 saioetan zehar,  publikazio kolektibo bat gauzatuko dugu saioz saio, urratsez urrats. Guillotina kolektiboaren eskutik, eta hainbat gonbidatuk lagunduta, fanzine baten geruza ezberdinak sortuko ditugu, barrutik eta kanpotik, abenduan emaitza kaleratu arte.

Lehen saioan gaiari heldu genion eta elkarrekin erabaki genuen gure fanzineak zer landuko duen. Bigarrenean, hitza izan zen ardatz, idazketa prozesua hasi genuelarik. Martxoan, marrazki eta testuen konbinaketa eta sekuenziazioa landu genituen, gidoitik irudira. Apirilean, aurreko saioetan landutakoa jaso eta ilustrazioaren lengoaiak erabili genituen orrialdeak betetzen jarraitzeko. Maiatzean zianotipia sartu genuen, negatiboen inpresioko teknika artisau eta monokromatikoa, gure orrialdeak kolore urdin biziz argiztatu dituena. Ekainean azala sortu genuen, irudi eta testuarekin, fanzineari kanpo itxura erakargarria eta koherentea emanez.

Udazkeneko lehen saio honetan azken urratsak ematen hasiko gara. Orain arte sortutako guztia bildu eta lan konplexua izango dugu esku artean: materialaren aukeraketa egin eta maketatu. Sortutako guztia ordenatzea, aukeratzea, baztertzea, kopiatzea, moztea eta itsastea izango da gure helburua. Modu analojikoan egingo dugu, fotokopiak, guraizeak eta kola erabiliz. Fanzine kolektiboa forma hartzen ari da.