Eginzaleak! 2023

Eginzaleak! "egitearen" kulturari buruzko topagunea da, non dinamika kolaboratiboen, kultura digitalaren eta praktika irekien inguruko proiektuak biltzen diren. Medialaben egindako lanaren erakusleihoa da, eta antzeko logikak darabiltzaten beste egitasmo eta eragile batzuk ere gonbidatuak daude bertara. 

Aurten, berriro ere jasangarritasunaren eta berrerabileraren ildo nagusia mantenduko du topaketak, arteari eta ehungintzari bereziki so eginez. 

Egun osoan zehar Tabakalerako 3. solairuan, arropa eta ehunen konponketa, berrerabilera eta bilakaera helburu duen praktikarako gunea jarriko da martxan. Sorkuntza gune honetan, Estudio Bokashi bidelagun izan dugu ehunak berrerabili eta moldatzeko lau estazio abiatuz. Gune bakoitzaren gidaritza, moda, sorkuntza eta sostengarritasunarekin loturiko eragileek egingo dute: 

-Upcycling – Sandra Linio, Clara Virgili, Jaione Anzola eta Alex Hug

-Custom – Aritz de la Hera eta Puntada Bastarda 

-Estanpazioa – Ane Baztarrika, Valeria Irisarri eta Urtzi Urkixo (Voltaire Lab)

-Jantzigela – Kika Merino, Julene Gregorio eta Markel Gonzalez

Praktika gune honetan parte hartzea irekia izango da estazio ezberdinak frogatu, sorkuntzan ausartu eta sostengarritasunaren gaian murgiltzeko.

Egun osoan zehar aktibo dauden estazioez gain, programa hau ere prestatu dugu:

11:30-13:30 – Kortsea kirol-kamisetekin – Ane Arana – Sarrerarekin

Kirol-kamiseta bat kortse bihurtzen ikasiko dugu, teknika sinpleak eta oinarrizko materialak erabiliz, eta hagatxorik erabili gabe. Helburu nagusia jantzien diseinuan sormena eta iraunkortasuna sustatzea da, eta, aldi berean, kirol-jantziak berrerabiltzeko eta bizitza berria emateko modu berriak aztertzea. 

17:00-19:00 – Topak denontzat – Alex Hug – Sarrerarekin

Topak jantzi magikoak dira, hainbat funtziotara egokitzeko moldakortasuna dutenak, hala nola kortseak, gerrikoak, topak edo pentsa daitekeen beste edozein erabilera. Oihal zatiekin eta bazterkinekin, edozein arropa edertzeko moduko jantzi harrigarri hauek sortuko ditugu. Oihal zati txiki horiek ikusteko modua aldatuko dugu, sormen eta adierazpen iturri agortezin bilakatuko direlarik.

19:30-20:00 Betile crocantiren ikusentzunezkoaren aurkezpena

Betile crocanti elkarlaneko espazio esperimental bat da, eta 2023ko irailaz geroztik dihardu Medialaben. Bertan, baztertutako edo erabilitako materialak birmoldatu eta larru, hezur eta egitura berrietan eraldatu, josi eta mutatu egiten dira. Maider Aldasoro, Estela Miguel (Hemen), Mikel Ruiz Pejenaute (JALEO), Estudio Bokashi (lehenThe Eko Lab) eta Dogartzi Magunagoicoechea (Divinoteca) artistek bultzatu dute taldea, eta bertan praktika horiei lotutako pertsonen komunitate zabal batek parte hartu du. Saio honetan orain arte egindako ibilbidea ezagutaraziko du taldeak modu kolektiboan sortutako ikusentzunezko piezaren bitartez.