Medialab magnoliatan 2023

Uda noiz etorriko zain ginen eta ia oharkabean iritsi zaigu. Berotasun bila ibiltzetik itzal eta aire korronteen atzetik joatera pasa gara egun batetik bestera. Eta zeinen gustora gainera!

Horrekin batera, heldu da berriz ere Medialab magnoliatan gozatzeko garaia: haiena baino itzal hobeagorik!

Aurten ere, aurreko urteetan bezalaxe, gure ohiko espazioa betiko moduan erabiltzeko aukera ez ezik, Tabakalera pareko magnolien altzoan muntatu dugun eremuan edonolako jarduera sortzaileak egitekoa ere izango duzu. Zuhaitz handiaren itzalpean gure bildumako liburu, komiki edota aldizkariak irakurri, jolasak probatu, solastu, egon…bakarka edo taldean giro atseginaz, espazioaz eta gure baliabideetaz disfrutatu… eta uda honetan, antolatu ditugun txoko ezberdinetan sortu, ikasi, esperimentatu eta ederki pasa. Izan ere, bi hilabetez irekia izango dugun aire zabaleko espazio honetan egunero-egunero, asteartetik ostiralera, edozein adin eta ezagutza mailako jendearentzat prestaturiko txoko dinamizatuak izango ditugu, astegun bakoitzean gai edo jakintza-esparru bati begira pentsatuak: robotika, buztina, eskulanak, maketa kolektibo bat, animazioa, maskarak, “tatuaiak”, eraikuntza-ariketak… denetarik!

Etor zaitez bada gurekin udako giroaz, Medialabez eta gure magnolien gerizpeaz gozatzera!

Uztailak 4-irailak 2

Asteartetik ostiralera, 10:30-19:30

Larunbatetan, 10:30-13:30

Astearteetan:

EMAN BOLUMENA!

Buztina hartu eta eskuak zikinduko ditugu, materiala gehitu eta kenduta, hustu eta gainjarrita, formekin esperimentatzeko.

EHUN EHUN

Hari eta artilearekin arituko gara ehungailuek nola funtzionatzen duten probatzen. Ea nolako artelan ederrak egiteko gai garen!

Asteazkenetan:

NOLAKOA DA ZURE ROBOTA?

Pieza desberdinak moztu eta batu, forma anitzeko robotak sortu eta gero marrazteko. Nolakoa izango da zure robot kuttuna?

ROBOT ACTION PAINTING

Kable, zirkuito eta errotulkiekin osatutako robot margolaria muntatuko dugu. Artista mekanikorik ezagutzen al zenuen?

Ostegunetan:

GORA, GORA, GORA

Txotxak, poliespana eta trebezia: hori baino ez dugu beharko gure gorputza bezain altuak izan daitezkeen dorreak altxatzeko!

GUZTIONTZAKO HIRIA

Denon artean egiten diren gauzak beti dira interesgarriagoak. Guztiontzat atsegina izango den hiria diseinatuko dugu maketa kolektibo bat eginez.

Ostiraletan:

HOCUS POCUS!

Ez da magia, baina begiari iruzur eginten ikasiko dugu, arteak maiz egiten duen bezala, traumatropo izeneko gailu bat sortuz. Txoria kaiolan edo kanpoan dago?

GORPUTZA, SORKUNTZA-TRESNA

Maskarak, azal-margoak, purpurina... modu askotan atondu dezakegu gure gorputza pertsonaia edota jarrera ezberdinak antzezteko. Zatoz gure antzoki ibiltarira!

*Ariketa bakoitza aste alternoetan egingo da.