Sun tunnels, Nancy Holt + Core, June Crespo, Maddi Barber

Larruak eta Izurrekin elkarrizketak:

• Sun tunnels, Nancy Holt, AEB, 1978, 26’
• Core, June Crespo, Maddi Barber, 2022, 21’

Tabakalerako zinetik bi proiekzio programatu nahi izan ditugu, Laura Vallések komisariatutako Larruak eta izurrak erakusketarekin elkarrizketan. Horretarako, komisarioarekin aritu gara hizketan, eta ideiak eta ikustaldiak partekatu ondoren bi saioko programa prestatu dugu, artistak eta zinegileak hartzen dituena.

Alde batetik, bi film laburrez osatutako lehen saioa. Lehenengoa, Sun tunnels (1978), Nancy Holt artista estatubatuarrarena, batez ere espazio publikoetarako edo Land Art-eko bere eskulturengatik ezaguna, baina beste baliabide batzuekin ere lan egin zuena, zinearekin esaterako. “Nire filmak, nire bideo-zintak eta nire liburua, horiek ere pertzepzioaren esparruan sortuak, paisaien edo tokialdaketen oroipenak izaten dira. Espazioaren indikazioak (tracking shot, paneo, aireko hartualdi eta walking shoten bidez) eta naturaren alderdiak (eguzki-argiak, hauts-hodeiek eta uretako islek sortutako patroiak) ikusmenak atzitzen ditu eta beste toki batzuetara garraiatzen dira, filmaren bidez, denboran zehar; bitartean, tokiko psikologia agertzen da bertako ahots, soinu edo musikaz baliatuta, soinu-pistetan edo horiekin batera doan testuan.” (Artistak adierazia Video Data Bank-erako, 1988). 

Bestetik, June Crespo eskultoreak −Larruak eta izurrak erakusketan parte hartzen ari dena− eta Maddi Barber zinegileak elkarrekin osatutako pieza bat: Core, (2022).

Sinopsia:

Norbait lo dago.

Uhal garraiatzaile batek harriak mugitzen ditu lurpeko toki batean.

Harriak aho formako zulo batetik erortzen dira.

Esku batzuek zementuzko pieza bat zeharkatzen dute.

Norbaitek harria birrintzen duen agintea maneiatzen dihardu.

Coren, materiala igarotzen den egoera desberdinak dokumentatzen ditugu: harria, hautsa, likidoa eta solidoa. Gauzen gainazalaren artetik eta haien azpitik aurrera eginez, itxuraz urrun dauden bi prozesu lotzen ditugu: eskuak zementuzko eskultura batzuk zeharkatzen eta manipulatzen, eta harrien erauzketa eta transformazio prozesua harrobi batean. Materialen arteko elkartzea eta frikzioa, aldi berean bi lengoaiaren −eskultorikoaren eta zinematografikoaren− arteko elkartzearen eta negoziazioaren emaitza. 

June Crespo eta Maddi Barber gurekin izango ditugu saioan, eta beraiekin hitz egin ahal izango dugu beren lanari buruz eta beren piezarekin zer gertatzen den Nancy Holten piezarekin batera ikusten dugunean. 

Bigarren saioa, maiatzaren 16koa, Pina Bauschi buruz Chantal Akermanek egin zuen filmari eskainia izango da.