Ireki, elkartu, eraiki. Hurbiltzeak eragin egiten digu

Erakusketa hau Tabakalerako “Harrotu ileak” bitartekaritza-proiektuaren parte da, artisten eta gure hirira iritsi berri diren gazteen arteko lankidetza sustatzen duen ekimena. 2017an sortu zenetik, “Harrotu ileak” proiektuak elkartzeko, sortzeko eta eztabaidatzeko gune bat eskaintzen du ostiralero, egoera prekarioan eta kalteberatasun-egoeran bizi diren gazteei zuzendua; eta erreferente bihurtu da komunitate horrentzat.

Azken sei urteotan, “Harrotu ileak” proiektuak sorkuntza-prozesuak gauzatu ditu; eta, prozesu horiei esker, parte-hartzaileek zuzenean eragiten dieten gaiak jorratu ahal izan dituzte (esaterako, eremu publikoko justizia sozialeko gaiak), estereotipoak eta estigmak zalantzan jarriz.

Ireki, elkartu, eraiki. Hurbiltzeak eragin egiten digu argazki-erakusketa bat da; azken hilabeteetan “Harrotu ileak” proiektuaren parte hartu duten gazteek Javi Julio, Lua Ribeira eta Nagore Legarreta artistekin elkarlanean egindako lana erakusten du. 

Erakusgai dauden argazkietan gehienek partekatzen duten bizi-esperientzia bat ageri da. Parte-hartzaileen beraien erretratuak jarri dira ikusgai; horien bitartez, haien istorioen eta ibilbide pertsonalen berri izan dezakegu. Jatorrizko lekua eta familia ageri dira, atzean geratu den denbora-espazio bat sinbolizatzen duen abiapuntu gisa; eta honaino iristeko bidaia, beste bizitza baten bila egindako beste leku bateranzko igarobide gisa.

Irudiek Donostiako errealitate berri bat ere erakusten dute, lagun berriek markatua; eta lan bilaketaren, prestakuntza-ikastaroen eta Tabakalerako arratsaldeen artean dabilen errutina.

Argazki guztiak artistek proposatutako ariketetan oinarrituta sortu dira. Erakusketa-planteamendua Nagore Legarretak egin du.